Регулаторната комисија за енергетика денеска ја прави редовната седумдневна пресметка, а движењата на светските берзи упатуваат на поевтинување на дериватите, каде што најизразена корекција надолу се очекува кај дизелот.
Суровата нафта ја заврши изминатата недела со значителен пад. Брент нафтата во петокот се движеше околу 89 долари за барел, односно според Ројтерс беше поевтина за околу 5,3 проценти во споредба со претходната недела. Американската WTI нафта во истиот период загуби околу 4,3 проценти, откако пазарите проценија дека снабдувањето од Персискиот Залив се подобрува, а протокот низ Ормутскиот Теснец се зголемува и покрај тензиите со Иран.
Кај самите нафтени деривати, лондонските фјучерси за гасно масло, како главен европски индикатор за дизелот, бележат пад од над пет проценти – од 1.125 на околу 1.066 долари за тон. Во однос на просечните дневни цени кои РКЕ ги зема предвид при пресметката, падот изнесува околу два проценти.
Ова следува по минатиот понеделник (24 август), кога РКЕ утврди раст на референтната цена за 4,842 проценти, по што дизелот поскапе за 3,50 денари и достигна 101,50 денари за литар, додека БС-95 поскапе на 93, а БС-98 на 95 денари.
Во прилог на поевтинувањето оди и движењето на американската валута. Оваа недела доларот во однос на денарот се движи меѓу 52,6 и 52,8 денари, наспроти претходниот просек од 52,9935 денари, што дополнително ја намалува набавната цена на дериватите.
Според берзанските показатели, проценките се дека има простор за намалување на цената на Еуродизелот за околу 1,5 до 2 денари за литар, со што би се спуштил на ниво од 99,50 до 100 денари. Кај бензините се очекува поумерено намалување, од околу половина до еден денар за литар.
Сепак, пазарот останува чувствителен на случувањата на Блискиот Исток. Ројтерс предупредува дека снабдувањето со преработени деривати останува затегнато поради проблеми со рафинериите, намален руски извоз и нарушувања на транспортните рути.
Новите цени на горивата кои РКЕ ќе ги утврди денеска ќе стапат на сила од ноќеска на полноќ (вторник во 00:01 часот).