ВМРО-ДПМНЕ го обвини СДСМ за лицемерие по обвинувањата на опозициската партија за ширење на таканаречениот „српски свет“ во Македонија, посочувајќи го случајот со поранешниот советник на Зоран Заев, чие име се појавува во обвинителен предмет во Косово поврзан со наводна соработка со српската Безбедносно-информативна агенција – БИА.
Од владејачката партија потсетуваат дека тој бил советник на Заев за локална самоуправа и член на високи партиски тела на СДСМ, а неговото име се споменува во материјалите од шпионската афера за која косовското обвинителство веќе поднесе обвинение против други лица.
„Додека обвинуваат за српски свет во Македонија, советник на Зоран Заев се појавува во предмет поврзан со БИА, а од друга страна градоначалници на СДС организираат концерти со пејачи кои српската опозиција ги смета за блиски до Александар Вучиќ“, реагираат од ВМРО-ДПМНЕ.
Партијата го посочува и градоначалникот на Крива Паланка, каде е најавен концерт на Лепа Брена, како и настапот на Ацо Пејовиќ во Македонска Каменица.
Од ВМРО-ДПМНЕ нагласуваат дека немаат ништо против настапите на српските пејачи, но велат дека ваквите настани се во спротивност со обвинувањата што СДСМ ги упатува кон актуелната власт за наводно ширење на влијанието на Белград во земјава.
„Вредно е да се нотира дека овие пејачи српската опозиција ги прогласи за режимски на Александар Вучиќ“, велат од ВМРО-ДПМНЕ.
Во реакцијата се споменува и поранешниот генерален секретар на СДСМ Љупчо Николовски, за кого од владејачката партија велат дека заедно со градоначалникот на Крива Паланка ќе присуствува на концертот на Лепа Брена.
Реакцијата на ВМРО-ДПМНЕ следува по прес-конференцијата на СДСМ, на која опозициската партија обвини дека српскиот претседател Александар Вучиќ води „хибридна војна“ на Балканот и дека дел од актуелната власт во Македонија е инструмент на таквото влијание.
Петрушевски претходно јавно ги отфрли наводите за негова поврзаност со српските разузнавачки служби и изјави дека неговите контакти биле од деловен карактер. Тој не е обвинет во косовскиот предмет.