Најмалку 27 лица загинаа, а уште 42 се повредени во руски напад со дрон врз магацин во Киевската област, по кој следувале силни секундарни експлозии, соопштија украинските власти. Меѓу повредените има и деца.
Нападот се случил во областа Буча, во близина на украинската престолнина. Според регионалниот гувернер Тимур Ткаченко, од погоденото подрачје биле евакуирани повеќе од 380 лица, а бројот на жртвите би можел дополнително да расте.
Украинскиот претседател Володимир Зеленски соопшти дека рускиот удар погодил магацин и предизвикал детонација, при што значително била оштетена и околната инфраструктура. Штети има на станбени објекти, како и на установа за згрижување стари лица.
Покрај истрагата за рускиот напад, украинските власти отворија и кривични постапки за можна службена небрежност поврзана со начинот на кој на локацијата биле складирани експлозивни материјали.
„Постојат правила – муниција не смее да се складира во близина на домови или други населени места. Оние кои дозволиле ова да се случи мора да одговараат за своите одлуки“, порача Зеленски.
Нападот доаѓа по два дена засилени руски напади со дронови врз Киев и околниот регион, при што беа оштетени магацини, станбени објекти и друга инфраструктура.