Лидерот на СДСМ, Венко Филипче, не гледа раскол во партијата по различните ставови со поранешниот премиер Димитар Ковачевски околу изградбата на дата-центри.
Откако Ковачевски саркастично ја коментираше одлуката на Советот на Пехчево да не даде зелено светло за иницијативата за дата-центар, иако Филипче претходно повика на пошироко обединување против вакви проекти, лидерот на СДСМ вели дека различното мислење не значи поделба.
„Раскол на тоа ниво и со Димитар Ковачевски никогаш немало по ниедна тема“, рече Филипче.
Според него, фактот што во јавноста можат да се слушнат различни ставови од функционери на СДСМ е доказ дека партијата функционира демократски.
„Не е раскол, туку доказ дека ние сме вистинска демократска партија и сечие мислење се цени и може да се каже во јавноста“, изјави Филипче.
Тој сепак останува на ставот дека прашањата што СДСМ ги отвора околу дата-центрите се легитимни, особено во делот на потрошувачката на вода и електрична енергија и можните последици за локалните средини.
Разликата во тонот стана видлива откако Филипче повика на „национална мобилизација“ против изградбата на дата-центри, додека Ковачевски со сарказам оцени дека „имала среќа Америка што го нема Пехчево“, алудирајќи на Силиконската долина и на одбивањето на инвестицијата во општината.
Со денешната изјава Филипче се обидува различните позиции да ги претстави како внатрепартиски плурализам, а не како судир со поранешниот премиер.