Вкупно 14 пожари на отворен простор се регистрирани денеска до 13:00 часот, од кои пет се активни, три се ставени под контрола, а шест се целосно изгаснати, соопшти Центарот за управување со кризи (ЦУК).
Според податоците од ЦУК, активни пожари има на повеќе локации низ државата:
- Во општините Студеничани и Зелениково (селата Моране, Вртекица, Рамни Габер со крак кон Палиград, како и над селото Вражале), каде гори мешана шума.
- На потегот меѓу Гостивар и Македонски Брод (од селото Трново кон селата Битово, Заград и Страјане), каде што се опфатени нискостеблеста шума, пасишта и папрат.
- Во Општина Росоман (крај селото Манастирец), каде се засегнати лозови и овошни насади.
- Во Општина Зелениково (село Тисовица), со опожарена мешана шума и ниска вегетација.
- Во Општина Чашка (над селото Нежилово, на местото викано Сватови), каде горат ниска вегетација и смреки.
Под контрола се поставени три пожари. Тоа се пожарот кај селото Тајмиште во општина Кичево (високостеблеста букова шума), како и пожарите на градските депонии во Кавадарци („Мелци“) и Делчево.
Екипите на терен целосно изгаснаа шест пожари во општините Желино (с. Желино), Теарце (с. Одри), Македонски Брод (помеѓу „Јасен“ и с. Брезница), Кичево (с. Зајас), Делчево (с. Ветрен) и Градско (с. Виничани).