Апелациониот суд Скопје донесе пресуда со која ја одби жалбата на Основното јавно обвинителство Скопје за предметот „Талир“ и целосно ја потврди ослободителната пресуда на Основниот кривичен суд Скопје за поранешниот премиер Никола Груевски.
Одлуката е донесена по одржана нејавна седница на 26.08.2026 година, по разгледување на сите списи во предметот и земајќи го предвид предлогот на Вишото јавно обвинителство Скопје.
При одлучувањето, Апелација оцени дека преземените дејствија од страна на Груевски биле во рамките на неговите овластувања и дека не се изведени докази оти постапувал спротивно на Законот за финансирање на политичките партии.
Судот утврди дека обвинителството не докажало надвор од разумно сомневање дека градежната компанија ГП „Бетон“ во моментот на склучување на договорите имала својство на субјект кој вршел јавни услуги.
Поради тоа, не постоела законска забрана за донирање средства на политичката партија, ниту пак постоела обврска за Груевски, како одговорно лице, тие средства да ги врати.
Од Апелациониот суд Скопје дополнуваат дека јавноста ќе биде известена кога пресудата во целост ќе биде објавена на нивната веб-страница.