Со свечено отворање кај Порта Македонија, денеска во Скопје започнува манифестацијата „Денови на Света Мајка Тереза“, која ќе трае до 5 септември. Настанот е посветен на одбележувањето на 10 години од канонизацијата на Мајка Тереза, родена во Скопје.
Манифестацијата ја организираат Скопскиот бискуп и Струмичко-скопски епарх монсињор д-р Киро Стојанов и Заедницата на Хрватите во Република Македонија – Огранок Скопје. Програмата опфаќа духовни, културни и хуманитарни настани посветени на животот и делото на светицата.
Свеченото отворање е закажано за денеска во 19:30 часот кај Порта Македонија. Монсињор Киро Стојанов ќе се обрати со тема „Скопјанката од Калкута која го промени светот“, додека м-р Љерка Тот Наумова ќе говори за животот и хуманитарната мисија на Мајка Тереза.
Програмата продолжува на 31 август во капелата на Спомен-куќата на Мајка Тереза, каде ќе има музички настап, читање избрани цитати од Мајка Тереза на македонски и англиски јазик и молитвен дел со Мисионерките на Љубовта од Скопје. Вечерта ќе заврши со благослов од епископот Стојанов.
На 1 септември во Домот на културата „Кочо Рацин“ ќе се одржи поетска вечер со песни посветени на Мајка Тереза. Во рамки на настанот ќе биде поставена и продажна изложба на дела од македонски академски сликари, а средствата од продажбата ќе бидат наменети за сиромашни лица, штитеници на Македонски Каритас.
На 3 септември во катедралата „Пресвето Срце Исусово“ ќе настапи Мандолинскиот оркестар „Скопје“, во чест на Мајка Тереза, под диригентство на Ерхан Шукри.
На 4 септември, монсињор Стојанов и делегација ќе посетат ранливи семејства и ќе им доделат пакети со храна и хигиенски производи. Истиот ден во катедралата ќе биде одржана света Литургија, по што дон Давор Топиќ ќе ги сподели своите сведоштва од канонизацијата на Мајка Тереза во 2016 година.
Манифестацијата ќе заврши на 5 септември со понтификална света Литургија во катедралата „Пресвето Срце Исусово“. Литургијата ќе ја предводи монсињор д-р Петар Палиќ, Мостарско-дувањски бискуп и Требињско-мркански апостолски администратор, во заедништво со монсињор Киро Стојанов и други бискупи гости.
Во пресрет на манифестацијата, во Спомен-куќата на Мајка Тереза ќе бидат отворени и три тематски изложби: „Мирот започнува со насмевка“, „Наследството на Мајка Тереза“ и „Апостолот на мирот и љубовта преку зборовите на познатите“. Поставките преку фотографии, сведоштва и пораки го прикажуваат нејзиниот живот, дело и влијание.