На територијата на државата до 13:00 часот се регистрирани вкупно 17 пожари на отворен простор, од кои 11 се сè уште активни, три се ставени под контрола, а три се целосно изгаснати, информираат од Центарот за управување со кризи (ЦУК).
Според извештајот на ЦУК, активни пожари има во неколку региони во земјава:
- Студеничани и Зелениково: Пожарот ги опфаќа селата Моране, Вртекица и Рамни Габер, со краци кон село Палиград и над село Вражале (мешана шума). Активен е и друг пожар кај село Цветово, на стариот пат кон Елово.
- Македонски Брод: Гори ниска вегетација, нискостеблеста шума и грмушки во месноста Видуш, кај селата Драгов Дол и Локвица.
- Кичево и Врапчиште: Во Кичево гори високостеблеста букова шума во месноста Дарда (село Тајмиште), додека кај село Ломница (Врапчиште) гори мешана шума.
- Маврово и Ростуше и Желино: Пожари на ниска вегетација се регистрирани во село Церово (Општина Маврово и Ростуше) и во истоименото село Церово во Општина Желино.
- Прилеп и Струмица: Во Прилепско активни се три пожари на ниска вегетација кај селата Бонче, Мажунчиште и Коњари, додека во струмичкото село Водоча гори стрниште.
Под контрола се ставени пожарите во Општина Прилеп (село Чаниште со краци кон Крушевица, Лопатица, Дуње и Црна Река), Општина Липково (село Никуштак) и Општина Тетово (село Бродец).
Пожарникарите успеаја целосно да ги изгаснат пожарите кај селото Белушино во Општина Крушево, во месноста Стари Лозја во Куманово, како и пожарот на депонијата во Делчево.