На територијата на државата во моментов се активни повеќе од 15 пожари на отворен простор, од кои четири се поголеми и поинтензивни, информираше директорот на Дирекцијата за заштита и спасување (ДЗС), Стојанче Ангелов.
Најголемиот пожар и понатаму е во Мариовскиот регион, на подрачјето на општините Прилеп и Битола, кој денеска е ставен под делумна контрола.
„Кракот којшто се движи над селото Крушевиште е значително намален. Можеби во вечерните часови ќе се приближи кон селото, но таму, на лице место, се наоѓаат сили од локалните пожарникари, поддржани со тимовите за брз одговор на ДЗС, составени од доброволци од Битола, Кочани и Виница. Имаме и четири екипи со специјални возила, односно огнените тимови на Дирекцијата“, изјави Ангелов.
Тој додаде дека околу селото се направени противпожарни пресеки, а огнената линија е намалена на еден до два километри, за разлика од претходните 25 километри. Подобрување има и кон магистралниот пат Прилеп–Битола.
„Во текот на ноќта, храбрите пожарникари од Прилеп, поддржани со храбрите доброволни пожарникари ангажирани преку Дирекцијата од Битола, ја нападнаа линијата на огнот и, при тоа, на мое големо неверување, успеаја да изгаснат повеќе километри огнена линија високо во планините. Во овој момент имаме таму само еден активен крак којшто се движи кон селото Бонче, но селото не е загрозено бидејќи имаме сконцентрирано доволно сили“, информира Ангелов.
Сериозна е состојбата и во Општина Македонски Брод, над селото Драговдол, каде што е активиран модулот за шумски пожари со 25 доброволци и пет оперативци на ДЗС, кои дејствуваат на исклучително тежок и непристапен терен.
Во Општина Ступеничани, огнот кој се движеше кон Китка е ставен под делумна контрола со помош на скопските пожарникари и авионска поддршка.
„Рано утрово таму направивме хеликоптерско извидување. Имаше само остатоци од горењето во еден дол… Затоа дадов наредба да дејствуваат ер тракторите, коишто во два налета, трите ер трактори, исфрлија околу 20 тони вода. Постои можност овој пожар целосно да згасне“, рече Ангелов.
Пожар е активен и во Општина Липково, над селото Никуштак, кој се движи кон селото Матејче и истоимениот манастир. На терен дејствуваат четири пинц-гауери, кумановските пожарникари и специјално БТР возило на ДЗС со шест тони вода поставено превентивно за заштита на првите куќи.
Останатите регистрирани пожари ширум државата се со помал интензитет.