Вкупно 115 ученици од средните училишта во Скопје утрово заминаа за Охрид, каде што ќе учествуваат во бесплатен наставно-научен едукативен камп.
Проектот има за цел да им овозможи на младите летниот период да го исполнат со учење, истражување и развивање на личните потенцијали.
За време на престојот во Охрид, учениците ќе бидат дел од научно-истражувачки работилници, едукативни предавања, интерактивни дискусии, тимски проекти, како и спортски, креативни и културни активности.
Посебен фокус за време на обуките ќе биде ставен на развојот на критичкото размислување, лидерските, комуникациските и презентациските вештини кај младите.
Орце Ѓоргиевски во својата објава ја истакна важноста од ваквите инвестиции во младата популација.
„Нашата задача не е само да им кажуваме на младите дека тие се иднината, туку да инвестираме во нив, да им отвораме врати, да им даваме можности и да создадеме услови во кои ќе можат да станат најдобрата верзија од себе. Затоа што секое ново знаење, секоја стекната вештина и секој охрабрен млад човек е инвестиција која му се враќа на целото општество“, истакна тој.
Покрај образовните и истражувачките активности, програмата предвидува учениците да се запознаат и со културно-историското богатство на Охрид.
Според најавите, ова е првата група ученици, додека втората смена од уште 115 средношколци ќе престојува во Охрид во периодот од 25 до 31 август.