Пожарот кој премина од територијата на Велес кон Зелениково е активен во овој момент, но со интервенција на велешките пожарникари е значително намален и заштитени се две загрозени села, информираше директорот на Дирекцијата за заштита и спасување (ДЗС), Стојанче Ангелов, во пладневниот преглед за состојбата со пожарите.
Тој посочи дека пожарот во Македонски Брод е значајно намален, додека огнот во општина Студеничани кај селото Рамни Габер е оддалечен и не загрозува населени места.
Според Ангелов, карактеристично за сите актуелни пожари е што никаде не гори квалитетна борова или друг тип шума.
Во овој момент нема загрозени села. Депонијата во Кратово е целосно затрупана и не претставува опасност за загадување на воздухот. Во текот на вчерашниот ден имавме 29 пожари на отворен простор. Благодарение на брзата реакција, а понекогаш и повеќечасовната борба на пожарникарите со пожарите 23 од нив беа изгаснати во текот на вчерашниот ден и во ноќните часови, додека шест се активни ова утро, рече Ангелов.
Директорот на ДЗС се осврна и на синоќешната ситуација во селото Чаниште, оддалечено 30 километри од Прилеп.
Огнот навлезе меѓу селските куќи, но според информации кои ги добив додека бев во селото не е изгорена ниту една куќа во која живеат останатите жители во селото. Сите жители на селото ноќта ја поминаа во своите домови. Изгорени се неколку стари и напуштени куќи, можеби некои од нив се користеле за престој на нивните сопственици, рече Ангелов, додавајќи дека се очекува овој пожар денеска да биде ставен под целосна контрола.
Тој ја издвои и интервенцијата во општина Јегуновце, каде што пламенот го загрозил атарот на селото Туденце и блискиот манастир.
Втората ситуација ја имавме синоќа на пожарот на територијата на општина Јегуновце кој навлезе во атарот на селото Туденце и го загрози блискиот манастир. Упатив неколку тимови на Дирекцијата за заштита и спасување и тоа од доброволци од Гостивар, од доброволното друштво „Чаир“ од Скопје и едно друштво од Тетово, истакна Ангелов.
На крајот од своето обраќање, тој упати апел до граѓаните за максимална претпазливост, предупредувајќи дека е доволна само една искра за да се предизвика катастрофа.