Пратеникот од редовите на ВМРО-ДПМНЕ, Бране Петрушевски, на денешната прес-конференција упати обвинувања до опозициската СДСМ и нејзиниот претседател Венко Филипче за ширење дезинформации и создавање паника меѓу граѓаните во врска со безбедноста на водата за пиење во Скопје.
Петрушевски истакна дека надлежните институции веќе ја демантирале веста и дека Министерството за внатрешни работи отворило истрага за утврдување на одговорноста.
„СДС и актуелното раководство никако да почнат барем малку да личат како сериозна опозиција. Претседателот на СДС, Венко Филипче е заедно на Егејот со својот другар Зоран Заев, но влијае на оние кои ги остави тука, односно им дава насоки за ширење на дезинформации. Овој пат дезинформациите и лагите се од огромни размери, односно создадоа паника кај граѓаните на Скопје. Со последната лага дека водата во Скопје е небезбедна, Филипче и актуелното раководство на СДС си поиграа дури и со здравјето на граѓаните“, изјави Петрушевски.
Тој додаде дека институциите соодветно и брзо реагирале на ваквите тврдења за да ја информираат јавноста.
„Надлежните институции веднаш реагираа, ја демантираа веста со факти, а Министерството за внатрешни работи започна истрага кој е креаторот на хаосот и паниката. Институциите се на потег за расчистување на случајот“, нагласи пратеникот.
Според Петрушевски, разликата меѓу актуелната власт и опозицијата е во односот кон граѓаните.
„За разлика од актуелната власт предводена од ВМРО-ДПМНЕ која се грижи за граѓаните од секој аспект, СДС на Заев и Филипче очигледно е дека прават само штети. Ширењето на лаги и крерање на атмосфера на паника и хаос, како и одење на ексклузивни одмори се единствена работа која Филипче и актуелното раководство знаат да ја прават и тоа е нивна специјалност“, порача тој.
Пратеникот од ВМРО-ДПМНЕ заклучи со апел до опозицијата веднаш да ги прекинат ваквите активности.
„Филипче и СДС треба да прекинат со лагите кои во овој случај се и крајно сериозни. Час поскоро Филипче и СДС треба да сфатат дека овие нивни обиди за лаги и ширење паника им нанесуваат штета само на нив“, истакна Петрушевски.