Во изминатата седмица во Грција се регистрирани 45 нови случаи на вирусот Западнонилска треска, со што вкупниот број на заразени од почетокот на летото достигна 110 лица, соопшти Националната организација за јавно здравје (ЕОДИ).
Според податоците од неделниот извештај на ЕОДИ, евидентирани се и три нови смртни случаи. Од вкупно 110 заразени, дури 81 пациент има симптоми на централниот нервен систем, како енцефалитис, менингитис или акутна парализа. Во моментов 35 лица се хоспитализирани, 61 е отпуштен од болница, а кај петмина не била потребна хоспитализација. За споредба, минатата година во Грција имаше вкупно 96 случаи и девет починати.
Состојбата се усложнува и во земјава, каде што македонското Министерство за здравство вчера (12 август) прогласи епидемија од западнонилска треска во неколку скопски општини и населби: Кисела Вода, Гази Баба, Аеродром, Бутел и Илинден, како и во Драчево, Пржино, Долно Лисиче, Кадино и Јурумлери.
Од почетокот на годината во Македонија се регистрирани 24 потврдени пациенти и двајца суспектни случаи. На Инфективната клиника се хоспитализирани 20 лица, од кои пет се во критична состојба и се поставени на механичка вентилација. Најголем дел од заболените се пензионери, а досега е регистриран еден смртен случај кај 83-годишен пациент со повеќе коморбидитети.
Западнонилската треска се пренесува преку убод од заразен комарец. Додека кај повеќето лица инфекцијата минува без симптоми или со полесна слика, кај повозрасните и лицата со ослабен имунитет постои голем ризик од тешки невролошки компликации.
Здравствените власти препорачуваат заштитни мрежи на прозорците, користење средства против комарци, носење долги ракави и избегнување престој на отворено во раните утрински часови и околу зајдисонце. При појава на висока температура, силна главоболка, вкочанет врат, конфузија или слабост во екстремитетите, од ИЈЗ апелираат веднаш да се бара итна медицинска помош.