Општина Центар започнува јавна анкета по Нацрт Деталниот урбанистички план за Градска четврт Ј 05 – Барутана, со цел вклучување на јавноста и граѓаните во процесот на донесување одлуки.
Градоначалникот Горан Герасимовски упати апел до жителите активно да се вклучат и да достават свои предлози, мислења и забелешки.
„Ниту една одлука не е само моја, ниту само на Општината или Советот. Одлуките треба да ги носиме заедно со граѓаните. Затоа ги повикувам сите жители да се вклучат во јавната анкета, бидејќи секое мислење е важно и секој предлог заслужува внимание. Само преку отворен дијалог можеме да носиме одлуки што ќе бидат во интерес на граѓаните“, порача Герасимовски.
Јавната анкета ќе трае од 13 август до 14 септември 2026 година.
Граѓаните ќе можат да пополнуваат анкетни листови во писмена форма секој работен ден од 08:00 до 16:00 часот во ООУ „Кочо Рацин“ (ул. „Салвадор Аљенде“ бр. 2), каде што нацрт-планот ќе биде изложен.
Исто така, анкетните листови се достапни и во електронска форма преку веб-страницата на Општина Центар и информацискиот систем е-урбанизам.
Јавната презентација на Нацрт ДУП-от е закажана за 3 септември 2026 година, со почеток во 12:00 часот, во просториите на Општина Центар (сала за состаноци, барака 6).
Нацрт-планот за Барутана се однесува на периодот 2025–2030 година и опфаќа површина од 6,89 хектари, дефинирана на север, исток и запад по оска на новопланираната улица „Јужна обиколница“, а на југ по границата на ГУП на Град Скопје.
За сите дополнителни информации, граѓаните можат да се обратат на телефонските броеви 02/3203-605 и 02/3203-660 или на е-пошта planiranje@centar.gov.mk.