Најмалку 132 лица го загубија животот во Колумбија по силниот земјотрес што ја погоди земјата, додека спасувачките тимови трагаат по преживеани под урнатините. Повеќе од 480 луѓе се повредени, а властите веќе прогласија вонредна состојба поради обемот на разурнувањата.
Според Националниот геолошки институт, земјотресот со јачина од 7,4 степени според Рихтеровата скала е регистриран во понеделникот во 7:34 часот по локално време, на длабочина од 103 километри со епицентар во провинцијата Чоко. Потресот предизвика големи штети во градот Переира, каде што се урнаа 65 згради, а жртви и разурнувања има и во регионите Вале дел Каука, Манизалес, Кибдо и Меделин.
Новиот колумбиски претседател Абелардо де ла Есприела потврди дека се оштетени повеќе од 1.500 домови и прогласи состојба на национална катастрофа за полесно справување со кризата.
С сведоштва за ужасот изнесоа повеќе очевидци. Анџелика Авила, која престојувала во еден од хотелите во Манизалес, ја опиша ситуацијата:
„Сите врескаа. Видов прашина како излегува од соседните згради и тули како паѓаа од ѕидовите“.
За преживеаните стравот бил неизбежен, што го потврдува и Ден Катлер (29) од Лондон, кој за време на земјотресот се наоѓал во Кали:
„Никогаш не сум доживеал такво нешто. Истрчавме надвор во пижами“.
„Нема големи структурни оштетувања на хотелот, но на ѕидовите се појавија пукнатини, а бојата и малтерот паднаа“.
Свој увид од Манизалес даде и новинарот и метеоролог Луис Фелипе Молина:
„Имам 450 книги, а само неколку останаа на полиците. Можеше да се слушне кршење на стакло и луѓе како врескаат“.
„Тоа беше ужасно искуство“.
Поради разорните последици, помош и поддршка веќе понудија САД, Европската Унија преку сателитскиот систем „Коперник“, како и Ел Салвадор со испраќање спасувачки тимови.