Портпаролот на ВМРО-ДПМНЕ, Валентин Манасиевски, на денешната прес-конференција упати серија жестоки обвинувања до претседателот на СДСМ, Венко Филипче.
Според Манасиевски, раководството на опозициската партија дава поддршка на лица кои претходно биле правосилно осудувани за кривични дела.
„Децата на Филипче се децата на предавникот Заев, талогот од СДС испливува на површина. Деца осудени за насилство и трговија со дрога е иднината која ја нуди Филипче на граѓаните. Венко Филипче смета дека со насилници и лица корисници на наркотични средства и опојни дроги треба да се гради иднина“, изјави Манасиевски.
Тој изнесе и конкретни имиња на лица кои, според него, имаат условни затворски казни.
„Христијан Ефтимов внук на Заеви, и Илија Стојанов негов другар, се лица кои се условно осудени на година и пол условна казна затвор, затоа што тепале странски државјани во Струмица, мислејќи дека можат што сакаат да прават затоа што се деца на Заеви. Истите овие деца Филипче ги претставува како жртви“, додаде тој.
Портпаролот на ВМРО-ДПМНЕ истакна дека таквите матрици не смеат да bidат дел од политичката иднина на земјата.
„Талогот на СДС не може и не смее да биде иднината која сите ние ја заслужуваме. Катаклизмичните 7 години на власт на СДС, со Заев и Филипче не смеат никогаш повеќе да се повторат“, заклучи Манасиевски.