Православните верници во недела, на 9 август, го одбележуваат празникот посветен на Светиот великомаченик Пантелејмон.
Според преданието, Свети Пантелејмон се родил во Никомидија од татко незнабожец, Евсторгиј, и мајка христијанка, Евула. Уште во младоста тој ја изучил лекарската вештина, а подоцна се крстил и го прифатил христијанството.
Се верува дека Господ му дал голема благодат да лечи од сите видови болести, не само преку лекарската вештина, туку и со силна молитва. Меѓу неговите исцеленија се издвојува враќањето на видот на еден слепец од кого останатите лекари се откажале. Поради завист од страна на лекарите, тој бил обвинет пред тогашните власти дека е христијанин.
Поради својата вера, Свети Пантелејмон бил ставен на тешки маки. Откако властите виделе дека тој не се поколебува во својата верност кон Бога, го испратиле на губилиште под едно маслиново дрво. Таму клекнал на колена, се помолил, по што му била отсечена главата. Тој пострадал во 304 година, а во христијанството се верува дека продолжил да исцелува преку неговите мошти.
Со овој празник се поврзуваат и повеќе народни верувања. Се смета дека денот е поволен за започнување бизнис или каква било нова работа, бидејќи се верува дека секој труд на Свети Пантелејмон е благословен и носи успех.
Исто така, се препорачува за оние кои планираат патување да тргнат токму на овој ден. Свети Пантелејмон важи за голем патник и заштитник на сите луѓе на кои улицата и патот им се втор дом.
Меѓу обичаите е заклучено и верувањето дека доколку во црква се сретнат две непознати лица кои овој ден го слават како куќна слава, треба да си честитаат и да се прегрнат, бидејќи се верува дека се роднини.