Портпаролката на СДСМ, Богданка Кузеска, денеска остро ја нападна Владата предводена од ВМРО-ДПМНЕ и премиерот Христијан Мицкоски, обвинувајќи ги за, како што рече, „неспособност, лаги и свесно загрозување на здравјето и животите на граѓаните“.
Повод за реакцијата е потврдата од Владата дека новите 400 пожарникари, кои беа најавени со голема помпа, сè уште не ја добиле ниту првата плата, и покрај тоа што веќе неколку месеци активно се ангажирани во општините.
„Ова е потценување на граѓаните и грубо манипулирање со младите луѓе кои ризикуваат живот за време на пожари, а не добиваат ниту денар. Одговорноста е директно кај Владата на Мицкоски и ВМРО-ДПМНЕ“, изјави Кузеска.
Според неа, додека народот се гуши во канцерогени честички и се соочува со еколошка катастрофа, власта не само што не презема мерки, туку и лаже.
Кузеска потсети и на пожарот во депонијата во Трубарево, посочувајќи дека граѓаните на Скопје „вдишувале олово, арсен и кадмиум“, додека, како што рече, владата молчела, без да алармира, без препораки и без заштита за населението.
„Лично Мицкоски тврдеше дека загадувањето не било големо. Ова не е само неспособност – ова е свесно загрозување на здравјето и животот на луѓето“, порача Кузеска.
СДСМ бара итна одговорност од Владата и најавува дека оваа тема ќе ја отвора на сите нивоа, со цел, како што велат, да се спречи понатамошна штета и да се заштитат граѓаните.