Вицепремиерот и министер за транспорт Александар Николоски денеска изјави дека со реализацијата на Коридорот 8 се покажува дека можат да се реализираат стратешки проекти и да се надминат проблемите од минатото.
Николоски ова го посочи пред потпишувањето на договорите за финансирање на изградбата на железничката делница Крива Паланка – Деве Баир, дел од источниот крак на Коридорот 8.
Тој истакна дека потпишувањето е продолжение на визијата на Владата Македонија да ја искористи својата позиција како раскрсница на европските транспортни коридори 8 и 10.
„Изградбата на Коридорот 8 е еден од врвните приоритети на Владата. Ова е исклучително значаен ден бидејќи по речиси две години работа доаѓаме до реален и остварлив проект што може да се реализира“, рече Николоски.
Тој информираше дека е постигнат договор со Бугарија за изградба на прекуграничен железнички тунел кој треба да ги поврзе двете држави.
„Очекуваме на крајот од овој месец да се одржи вториот меѓувладин состанок во Скопје, а двете држави ќе испратат заедничко писмо до ЕУ, ЕИБ и ЕБОР за обезбедување грант средства за изградба на тунелот“, додаде Николоски.
За третата делница од железничкиот Коридор 8 преку Инвестициската рамка за Западен Балкан на Европската Унија се обезбедени 149 милиони евра грант средства.
Николоски најави дека во текот на оваа година се очекува почеток на градежните активности, а наесен треба да биде избран изведувачот.
„Веќе има активен тендер за избор на надзор, кој се одвива во две фази, а тендерот за градба ќе биде спроведен во една фаза“, информираше министерот за транспорт.
На потпишувањето на договорите во Владата присуствуваа и премиерот Христијан Мицкоски, министерката за финансии Гордана Димитриеска-Кочоска, претставници на ЕУ, ЕБОР, ЕИБ и директорот на Железници – Инфраструктура, Синиша Ивановски.