Силен снег и леден бран предизвикаа прекини во сообраќајот и секојдневното функционирање низ Нов Зеланд.
Моќниот поларен бран донесе снежни врнежи дури и во низинските области, што доведе до затворање на бројни патишта, училишта и сериозни проблеми во поморскиот сообраќај.
Според пишувањата на „Њу Зеланд Хералд“, снегот го прекри поголемиот дел од Јужниот Остров додека студениот систем брзо се движеше низ целата земја.
Поради замрзнатите коловози и снежните наноси, полицијата упати апел до жителите на градот Данидин да избегнуваат секакви патувања кои не се неопходни.
Метеоролошката служба издаде предупредувања за повеќе главни патни правци, а лошото време ја прекина и наставата.
Сите основни и средни училишта, како и градинките во Данидин, Мосгиел, Порт Чалмерс и Ваикуаити се затворени, а настава нема и во средното училиште „Ист Отаго“ во Палмерстон.
Дополнително влошување на времето е забележано во Куковиот теснец, каде силните ветрови предизвикаа хаос во фериботскиот превоз меѓу Северниот и Јужниот Остров.
Компанијата „Интерислендер“ откажа четири фериботски линии меѓу Велингтон и Пиктон, додека „Блубриџ“ ги откажа сите шест поаѓања во вторник и уште две утрински линии за среда.
Националниот Метсервис издаде предупредување и за високи морски бранови по должината на брегот Ваирарапа, кои до среда наутро би можеле да достигнат висина и до шест метри.
Иако снегот е ретка појава во низините на Нов Зеланд, земјата во моментов се наоѓа во самиот пик на зимската сезона на јужната хемисфера.