Вкупно 13 пожари на отворен простор се регистрирани денеска до 13:00 часот на територијата на државата.
Според последните податоци, пет од пожарите се сè уште активни, два се ставени под контрола, додека шест се целосно изгаснати.
Активни жаришта има во Скопско, каде што гори депонија кај Кванташкиот пазар во општина Гази Баба, како и ниска вегетација во селото Страчинци. Активен е и пожарот кај селото Маркова Сушица во општина Студеничани.
Пожари на ниска вегетација се активни и во општина Струга, во атарот на селото Јабланица, како и во општина Чешиново-Облешево, каде што гори кај селото Уларци.
Под контрола се ставени пожарите помеѓу селата Слатина и Грешница во општина Македонски Брод, каде што беше зафатена деградирана дабова шума и ниска вегетација, како и пожарот кај селото Долно Татеши во Струшко.
Пожарникарите успеале целосно да ги изгаснат пожарите во општина Кисела Вода кај гробиштата во Драчево, депонијата во Визбегово во општина Бутел, како и пожарите во селото Опила (Ранковце), селото Брвеница, селото Неготино (Врапчиште) и на местото викано Бурки – Долно Егри во Битолско.