Жена од округот Лос Анџелес за малку ќе го изгубела животот откако била касната од ѕвечарка во сопствениот двор, додека боса ги полевала розите.
Камерите за видеонадзор го снимиле целиот настан, а на снимката се слуша крикот на Линда Мартин во моментот кога змијата ја напаѓа. Жената изјави дека воопшто не го слушнала карактеристичното предупредувачко тропање на ѕвечарката.
„Отидов да кренам грмушка и тогаш ја видим ѕвечарката“, изјави Линда за CBS News.
Симптомите настапиле со исклучителна брзина, само триесетина секунди по каснувањето.
„Во рок од 30 до 45 секунди, почнав да чувствувам трнење во врвовите на прстите. Потоа се прошири на вилицата, образите и јазикот“, рече таа.
Дополнителен проблем настанал кога поради липса на мрежен сигнал во населбата Стивенсон Ранч не успеала да се поврзе со службата за итна помош 911. Нејзиниот сопруг веднаш реагирал и со сопствено возило ја пренесол во болница, каде што по десет минути ѝ бил аплициран противотров.
„Се јавив втор пат, но повикот воопшто не беше поврзан. Се јавив трет пат, а мојот сопруг само рече: „Влези во колата“. Да не беше мојот сопруг дома, а јас бев сама, не знам што ќе се случеше“, додаде Линда.
Експертите предупредуваат на значаен пораст на инцидентите со змии во Калифорнија. Ли Кантрел, директор на Калифорнискиот систем за контрола на труења, истакна дека оваа година има значително повеќе повици во споредба со претходните години.
„Минатата година имавме малку над 400 повици за ѕвечарки. А во првите шест месеци од 2026 година имавме 250 повици“, рече Кантрел.
Според него, потоплата пролет ги извадила змиите од хибернација порано од вообичаено, што доведе до зголемување на бројот на каснувања за околу 20 проценти, при што годинава се регистрирани три смртни случаи во државата.
По закрепнувањето, Мартин истакна дека во иднина ќе биде многу повнимателна при работата во дворот.
„Се насмеав. Следниот пат кога ќе одам во градината, ќе носам заштитно одело, бидејќи се плашам да одам таму… Дефинитивно нема повторно да работам во градината без чизми“, заклучи таа.