Повеќе од 116.000 хектари површина се изгорени во Франција од почетокот на годинава, што го прави овој бран пожари пожосток дури и од рекордната 2022 година. Француските власти потврдија дека од 6 јули досега се уапсени 162 лица под сомнение за предизвикување оган, а според официјалните податоци, дури девет од десет пожари се предизвикани од човечки фактор – од невнимание или со умисла.
Според премиерот Себастијан Лекорну, причините најчесто се невнимание со фрлени пикавци, правење скара или градежни работи, но дел од пожарите се и намерно подметнати. За намерно предизвикување пожар законски е предвидена казна затвор до 15 години. Досега се регистрирани вкупно 13.566 пожари во кои изгореа 116.085 хектари, со што е надмината 2022 година кога беа уништени 72.000 хектари.
Состојбата е особено критична во југоисточниот департман Вар, каде што избија три нови пожари речиси истовремено кај Варажес. Префектот Симон Бабр побара дополнителни безбедносни сили и оцени дека овие случувања не се случајни.
„Концентрацијата и тајмингот на пожарите на познати пожарни коридори од минатото не можат да бидат случајност“, изјави Бабр.
Поради тоа, пристапот до шумите е целосно затворен, а властите истражуваат можна намерна саботажа. Поради големиот пожар кај Понтевес, кој изби уште на 21 јули, веќе се евакуирани илјадници луѓе.
Покрај пламените јазици, противпожарните екипи се соочуваат и со феноменот пирокумулонимбуси – таканаречени огнени облаци кои создаваат сопствен ветар и молњи. Францускиот истражувач Жан-Батист Филипи објаснува дека овој феномен, кој порано беше карактеристичен за Португалија, Калифорнија и Австралија, станува реалност и во Франција поради климатските промени. Овие облаци во земјата првпат беа забележани во 2022 година кај Ландирас, јужно од Бордо.
Дополнителен проблем за противпожарниот систем предизвика и хакерски напад. Париското обвинителство отвори истрага за хакерски упад врз пет противпожарни и спасувачки служби во департманите Ен, Алпи на Горна Прованса, Приморски Алпи, Ланд и Марна. Иако од системите се извлечени лични податоци, функционалноста на службите не е нарушена, а засега нема потврда дали нападот е поврзан со пожарите.
Драматична е состојбата и во соседството. Во Португалија стотици пожарникари и авиони се борат со огнот кај Браганса, Гуарда и Сантарем, а за северниот и централниот дел од земјата е прогласена максимална опасност од пожари.