Во „Тема на денот“ на Сител телевизија гостуваше градоначалникот на Општина Карпош, Сотир Лукровски кој истакна дека најважните проекти, каде говореше за актуелните проекти што ги реализира општината, со посебен акцент на базенот и салата „Партизан“.
Лукровски информираше дека од почетокот на септември Општина Карпош ќе го отстапи базенот кој се наоѓа во салата Партизан на користење на Пливачката федерација, врз основа на одлука на Советот на Општината. Според него, проектот е поддржан од Владата, при што упати благодарност до премиерот и Владата за поддршката.
„ Од почетокот на септември зедовме обврска со одлука на Совет да го дадеме базенот во владение на Пливачката федерација. Идејата е потпомогната и од Владата сакам да нагласам и да се заблагодарам на премиерот и на Владата. Пливачката федерација ќе го користи базенот во Карпош од пладне до вечерните часови за сите пливачки клубови подеднакво, а до пладне ќе имаат обврска да организираат курс за пливање. Тука ги опфаќаме дечињата од прво до трето одделение од нашите основни училишта кои се околу 2000 дечиња“, вели Лукровски.
Тој се осврна и на спортската сала „Партизан“, посочувајќи дека објектот, чија изградба започнала во времето на поранешната Агенција за млади и спорт, е завршен од Министерството за спорт и сега е под надлежност на Општина Карпош.
Според градоначалникот, салата не била во функција до почетокот на неговиот мандат поради неуспешни јавни повици и нерешени инфраструктурни прашања. Во моментов, Општината подготвува проект за системи за греење, ладење и вентилација, со цел да се обезбедат соодветни услови за користење на објектот. Лукровски најави и отворање на првиот Младински и ресурсен центар во Општина Карпош, кој ќе биде сместен во рамки на салата „Партизан“.
„Започната е изградбата поодамна од тогашната Агенција за спорт сега ја доврши Министерството за спорт, така да салата е во наши ингиренции, ние стопанисуваме со неа, до почетокот на мојот мандат не функционираше, имаше некои јавни повици кои беа неуспешни, за жал како и многу проекти кои наследив во општината се нецелосни, некомплетни да речеме, така да имаме одредени аномалии. Спремаме проект за ладење и греење и вентилација во салата, меѓутоа и што е најинтересно со моето доаѓање отвараме прв пат во општината Карпош, Младински и ресурсен центар, исто во склоп на салата Партизан и можам да кажам дека сега салата е во полна функција“, рече Лукровски.