Во Собранието денеска ќе заседаваат шест комисии, кои ќе разгледуваат повеќе предлог-закони од областа на енергетиката, транспортот, високото образование, меѓународната и привремената заштита, како и осигурувањето.
Комисијата за економски прашања, труд и енергетска политика ќе расправа за Предлог-законот за изменување и дополнување на Законот за енергетика, по скратена постапка.
На седницата на Комисијата за транспорт, дигитална трансформација, животна средина и просторно планирање ќе се разгледува Предлог-законот за изменување и дополнување на Законот за автокампови, исто така по скратена постапка.
Комисијата за одбрана и безбедност ќе го разгледа Предлог-законот за изменување и дополнување на Законот за меѓународна и привремена заштита, додека пред членовите на Комисијата за финансирање и буџет ќе се најде Предлог-законот за изменување на Законот за супервизија на осигурување.
Комисијата за образование, наука и спорт, пак, во прво читање ќе ги разгледа предлог-законите за високото образование, за обезбедување квалитет во високото образование и науката и за научноистражувачката дејност.
Во текот на денот ќе заседава и Законодавно-правната комисија, која ќе одржи две седници. На 185. седница, во прво читање, ќе бидат разгледани предлог-законите за високото образование, за обезбедување квалитет во високото образование и науката и за научноистражувачката дејност. На дневен ред е и Предлог-одлуката за изменување на Одлуката за продолжување на рокот на кризна состојба поради можни нарушувања во снабдувањето со нафта и нафтени деривати во Република Северна Македонија.
На 186. седница, по скратена постапка, Законодавно-правната комисија ќе расправа за измените и дополнувањата на законите за енергетика, автокампови и меѓународна и привремена заштита, како и за измените на Законот за супервизија на осигурување.