Министерката за енергетика, рударство и минерални суровини, Сања Божиновска, денес учествуваше на панел-дискусијата „Институционална и правна рамка што поддржува одржливи корпоративни практики“. Настанот беше организиран во рамки на Бизнис форумот „Претворање на одржливоста во конкурентност“ од страна на МНР, Стопанската комора и ОН.
Во своето обраќање министерката порача дека одржливоста денес не е само еколошка цел, туку еден од најважните економски предуслови за развој и конкурентност на домашните компании.
„Пред само неколку години на зелената транзиција се гледаше како дополнителен трошок. Денес таа е најдобрата инвестиција што една компанија може да ја направи. Компаниите што вложуваат во енергетска ефикасност, обновливи извори и нови технологии ќе бидат компаниите што утре ќе извезуваат повеќе, ќе привлекуваат повеќе инвестиции и ќе отвораат нови работни места“, истакна Божиновска.
Таа нагласи дека Министерството создава стабилна и европски усогласена регулатива која ќе им овозможи на компаниите сигурно да инвестираат и да планираат долгорочно.
„Нашата задача е да создадеме услови во кои зелената транзиција нема да биде товар за стопанството, туку негова најголема развојна возможност. Затоа носиме модерни закони, ја поедноставуваме регулативата и обезбедуваме конкретна финансиска поддршка за инвестиции во енергетска ефикасност и обновливи извори на енергија“, рече министерката.
Божиновска потсети дека новиот Закон за енергетика веќе воспоставува современа рамка усогласена со ЕУ, додека Законот за обновливи извори претставува една од најзначајните реформи.
Ресорното министерство сега воспоставува нов, транспарентен систем за планирање на инвестициите во електроенергетската мрежа со јасни правила за стабилност.
„Сакаме компаниите да бидат активни учесници во новата енергетска економија, не само потрошувачи. Нашата цел е да создадеме услови секој што инвестира во сопствено производство на енергија, складирање и модерни технологии да стане дел од енергетската трансформација на државата“, нагласи Божиновска.
Паралелно се инвестира во модернизација на електроенергетската инфраструктура, дигитализација на системот и поедноставување на процедурите за бизнис секторот.
На крајот, министерката испрати јасна и директна порака до присутните претставници на бизнис заедницата:
„Намалувањето на емисиите, енергетската ефикасност и декарбонизацијата не се само исполнување на европските стандарди – тие се најпаметната деловна одлука за секоја компанија што сака да биде конкурентна и успешна на долг рок. Министерството ќе продолжи да биде силен партнер на стопанството во овој процес“, порача министерката Сања Божиновска.