Регулаторната комисија за енергетика (РКЕ) размислува за значајни измени во начинот на кој граѓаните ја плаќаат електричната енергија, со цел намалување на месечните сметки.
Како една од главните опции кои во моментов се анализираат е проширување на периодот на евтината тарифа, па дури и нејзино воведување во деновите од викендот, поточно во сабота.
Претседателот на РКЕ, Ацо Ристов, во интервју за МИА посочи дека постоечките блок тарифи беа воведени како кризна мерка, но дека пазарот веќе наметнува нови правила.
„Генералната идеја е граѓаните да плаќаат пониски сметки за потрошената електрична енергија. Сметаме дека има простор за ревизија на блок тарифите и нивно прилагодување на новите трендови во производството на електрична енергија од обновливи извори“, вели Ристов.
Како причина за ваквите промени се наведува растот на производството од сончеви и ветерни електрани. Ова создава вишоци во текот на денот кога цените на берзите драстично паѓаат.
Првичните анализи покажуваат дека во периодот од 11 до 15 часот има вишок на струја, што отвора простор за дедневна евтина тарифа, но истовремено наметнува и потреба за ревизија на ноќната тарифа.
„Најскапата електрична енергија на пазарот денес е меѓу 21 и 24 часот, а токму тогаш кај нас важи евтината тарифа. Тоа е економски нелогично и покажува дека треба да се приспособиме на новите услови на пазарот“, нагласува Ристов.
Од РКЕ додаваат дека целта е да се заштитат и инвеститорите во зелена енергија, бидејќи екстремно ниските берзански цени дење можат да го забават развојот на овој сектор.