Нестабилно време со врнежи, грмежи и засилен ветер се очекува денеска низ земјава поради влијание на циклон од југоисточниот дел на Балканот.
Според прогнозата на Управата за хидрометеоролошки работи, на повеќе места ќе има дожд и електрични празнења, а локално се можни и поинтензивни атмосферски процеси проследени со обилни врнежи, силни налети на ветер и појава на град.
Утринските температури ќе се движат меѓу 14 и 20 степени, додека дневните ќе достигнат од 27 до 35 степени Целзиусови.
Во главниот град се најавува променливо и нестабилно време со дожд и грмежи. Во одредени делови од Скопската Котлина постои можност за краткотрајно невреме. Температурата ќе се движи од минимални 17 до максимални 32 степени.
Метеоролозите предупредуваат дека поради зголемената нестабилност во атмосферата, на одделни локации може да се развијат поизразени временски непогоди. Во текот на четврток и петок се очекува само локална и изолирана нестабилност, додека за викендот и во првите денови од наредната седмица се прогнозира претежно сончево и потопло време.