Премиерот Христијан Мицкоски изјави дека Владата и најголемите синџири на маркети постигнале договор за заедничко дејствување со цел да се ограничи растот на цените на основните прехранбени производи. Целта, како што посочи тој, е во јули годишната инфлација кај храната да биде под три проценти.
„Една од тие цели е да, во јули месец, годишната стапка на промена на цените на основните прехранбени производи не биде поголема од 3%, односно да биде под 3%. Се сложивме сите дека за да се реализира тоа потребно е да направиме еден ваков состанок со производителите, дистрибутерите и добавувачите“, рече Мицкоски.
На прашањето што ќе се случи доколку договорените мерки не бидат почитувани, Христијан Мицкоски истакна дека Владата веќе ги разгледува можните чекори и законски решенија.
Тој посочи дека се анализираат сите состојби што биле претходно изнесени, како и можности за измени во законската регулатива, со цел поуспешна реализација на поставените цели.