Свештената бигорска Обител и оваа година традиционално ќе го одбележи празникот посветен на Пресвета Богородица, во чест на нејзината чудотворна икона „Достојно ест“, која во манастирот пристигнала кратко по пожарот на 30 септември 2009 година, кога беше зафатен и Горни Палат.
На 23 јуни (вторник) 2026 година, во Бигорскиот манастир во 21 часот ќе започне сеноќно бдение во чест на празникот и во спомен на иконата „Достојно ест“. Од манастирот информираат дека сите верници кои сакаат молитвено да учествуваат се добредојдени на духовната свеченост.
Како што истакнува архимандрит Кирил, копијата од иконата во манастирот пристигнала во 2009 година како духовна утеха по големото искушение со пожарот.
-Со тоа Богомајката им покажа на своите чеда монаси дека е со нив и во најтешките мигови, давајќи им сила и утеха за духовна борба. Благодарното монашко срце со години ја изразува својата верност преку сеноќни бденија и славословија во чест на Царицата и нејзината икона „Достојно ест“. Така и сега, со љубов и вера, ќе се соберат верниците во Бигорскиот манастир на духовна средба со Мајката на животот, во чии прегратки исчезнуваат тагата и неволјата – изјави за МИА архимандрит Кирил.
Според црковниот календар и преданието, на 24 јуни се празнува иконата „Достојно ест“ во спомен на чудото што се случило пред неа во времето на патријархот Никола Хрисоверг (983–996).
Во Бигорскиот манастир традиционално се очекува голем број верници кои ќе присуствуваат на одбележувањето на празникот посветен на иконата „Достојно ест“.