Скопје денес и утре ќе биде домаќин на меѓународната конференција „Дијалог за единство и мир 2026“, на која ќе се дебатира за современите глобални предизвици и можностите за зајакнување на меѓународната соработка, мирот и дијалогот. На настанот ќе присуствуваат поранешни државници, министри, дипломати, универзитетски професори, истражувачи, претставници на меѓународни организации, стопанственици и млади учесници од повеќе европски и азиски земји.
Конференцијата е организирана од Кабинетот на поранешниот претседател на Македонија, д-р Ѓорге Иванов, Меѓународниот центар Алијанса на цивилизациите (ICAC) и Алумни асоцијацијата на Школата за млади лидери на претседателот Иванов (ISLAA). Во текот на двата дена ќе се реализираат повеќе тематски панели посветени на меѓународната безбедност, владеењето на правото, економскиот подем на Кина, регионалната поврзаност и односите меѓу Кина и државите од Централна и Источна Европа.
Конференцијата свечено ќе ја отворат поранешниот претседател Ѓорге Иванов, вицепремиерот задолжен за политички систем Љупчо Димовски, амбасадорот на Народна Република Кина Џијанг Сјаојан, како и претставник на Кинеската асоцијација за меѓународно разбирање (CAFIU).
Првиот панел ќе биде посветен на предизвиците поврзани со мирот, безбедноста и владеењето на правото. Покрај Иванов, во дискусијата ќе учествуваат и поранешниот турски министер за надворешни работи Мевлут Чавушоглу, поранешниот претседател на Генералното собрание на Обединетите нации и поранешен шеф на српската дипломатија Вук Јеремиќ, поранешниот министер за надворешни и европски работи на Хрватска Миро Ковач, како и Ерик Ли, претседател на Центарот за Кина и глобализација и познат аналитичар за меѓународни односи. Дел од панелот ќе биде и Иван Иванов, претседател на Извршниот одбор на Меѓународниот центар Алијанса на цивилизациите.
Во рамки на конференцијата ќе се одржат и дискусии за економскиот развој, регионалната соработка, цивилизацискиот дијалог и културната размена. Посебен акцент ќе биде ставен на дигиталната трансформација, вештачката интелигенција, креативноста и развојот на човечкиот потенцијал, како и на улогата на младите во време на брзи глобални промени и неизвесност.