Интерпелацијата за работата на министерот за внатрешни работи, Панче Тошковски, е ставена на дневен ред на 106. пленарна седница закажана за в среда, 24 јуни, додека во четврток, на 25 јуни, ќе се одржат редовните пратенички прашања до премиерот и министрите.
На денешниот брифинг со новинарите, претседателот на Собранието најави одржување на уште една седница до крајот на јуни, наменета за законите поврзани со реформската агенда, како и продолженија на другите започнати седници.
Во однос на реконструкцијата на Владата, беше посочено дека седницата ќе биде закажана во моментот кога предлогот официјално ќе биде доставен до законодавниот дом.
Без да имаме предлог за промена во владиниот Кабинет ние не можеме ништо да прејудицираме. Зависи од тоа дали ќе има нов предлог и кога ќе биде доставен – изјави претседателот на Собранието.
Дополнително, најавено е дека во текот на утрешниот ден до Собранието треба да пристигне ребалансот на Буџетот за 2026 година, со што ќе почнат да течат собраниските рокови пред пратениците да заминат на планираниот одмор од 1 до 31 август.
Дел од реформскиот пакет закони што се разгледуваат се предлог-законите за судска и за јавнообвинителска служба, законот за користење на енергија од обновливи извори, како и Предлог-законот за високи раководители и измените за електронски комуникации, угостителска дејност и договорен залог.
Ако Владата достави нови закони поврзани со реформската агенда веднаш ќе свикаме седница, комисиска расправа и се што е потребно да се стигне до 30 јуни – порача првиот човек на Парламентот.
Прашан за политичката стабилност и евентуални предвремени избори, тој истакна дека принципиелно секогаш поддржува редовни изборни циклуси, но додаде дека одлуката на крајот му припаѓа на мнозинството од 61 пратеник.
Принципиелно мислам дека треба редовни избори да бидат, но тоа е тоа – додаде тој.
Околу проблемот со пратениците како Мендух Тачи и Али Ахмети, кои воопшто не доаѓаат на седници и комисии, беше потенцирано дека граѓаните се оние кои го даваат легитимитетот, а Собранието нема механизам за принуда.
Ние имаме механизми, Деловник за работа, но не можете со сила некого да натерате да дојде во Собрание. Ако граѓаните се одлучат да гласаат ние мора да го почитуваме тоа – заклучи тој, информирајќи и дека Европскиот парламент побарал од шесте земји од Западен Балкан да формираат граѓански форум.