Кривичниот совет при Основниот кривичен суд Скопје донесе решение со кое го уважи предлогот на одбраната на Н.В. и Н.Н. за укинување на мерката притвор и нивно пуштање на слобода со определување гаранција.
Одлуката на судот следува по претходно добиеното позитивно мислење од страна на надлежното Јавно обвинителство, а се однесува на случајот во кој меѓу обвинетите е и поранешниот директор на Клиниката за онкологија, Нино Васев.
Во официјалното соопштение од судот прецизно се наведени милионските износи во денарска противвредност понудени како имотна гаранција за двајцата обвинети.
„На обвинетиот Н.В. му е определена гаранција во износ од 183.981 евра во корист на Република Северна Македонија, која се состои од ставање под хипотека на недвижен имот, додека на обвинетиот Н.Н. му е определена гаранција во износ од 348.049 евра, исто така со ставање под хипотека на недвижен имот“, се вели во соопштението.
Покрај прифатената гаранција, на обвинетите им се изречени и неколку дополнителни мерки за претпазливост со кои им се ограничува движењето.
„Воедно, на обвинетите им се определени и следните мерки на претпазливост: забрана за напуштање на живеалиштето, односно престојувалиштето на територијата на град Скопје; обврска еднаш месечно да се јавуваат во судот; и привремено одземање на патните исправи и забрана за издавање нова патна или друга исправа за преминување на државната граница“, појаснуваат од Кривичниот суд.
Судскиот совет при носењето на одлуката го земал предвид и законскиот рок до кој најдоцна можела да трае претходно определената мерка притвор.
„При одлучувањето, покрај позитивното мислење на Јавното обвинителство, Советот го имал предвид и фактот дека мерката притвор, определена со решение на Апелациониот суд Скопје, согласно законските одредби, може да биде продолжувана и да трае најдоцна до 18 јули 2026 година. Со оглед дека надлежното обвинителство се откажа од правото на жалба против овие решенија, а хипотеката понудена како гаранција е веќе впишана во Катастарот на недвижности, истите станаа правосилни, по што обвинетите се ослободени од притвор“, стои во соопштението на судот.