Собраниската Комисија за одбрана и безбедност денеска ќе одржи седница на која во второ читање ќе го разгледува Предлог-законот за оружјето. Овој законски предлог е една од клучните точки на дневниот ред на собраниските комисии кои ќе заседаваат во текот на денот.
Покрај оваа седница, членовите на Комисијата за надворешна политика и надворешна трговија, како и на Законодавно-правната комисија, ќе расправаат за два предлог-закони за ратификација поврзани со меѓународната соработка и трговијата.
На дневен ред е Предлогот на закон за ратификација на изменувањето и дополнувањето на Договорот за изменување и пристапување кон Централноевропскиот договор за слободна трговија (ЦЕФТА), согласно Одлуката на Мешовитиот комитет бр. 2/2024 од 9 октомври 2024 година, со која се предвидуваат мерки за олеснување на електронската трговија.
Пратениците ќе го разгледуваат и Предлогот на закон за ратификација на изменувањето на Протокол 4 кон Спогодбата за партнерство, трговија и соработка меѓу Република Северна Македонија и Обединетото Кралство. Измените се однесуваат на дефиницијата на концептот „производи со потекло“ и методите на административна соработка, согласно Одлуката бр. 1/2026 на Советот за партнерство од 26 јануари 2026 година.