Познатиот американски актер Роберт Келкер-Кели почина ненадејно на 62-годишна возраст во својот дом во Мисури.
Полицијата и итната медицинска помош добиле повик во саботата околу 20:16 часот по локално време, откако било пријавено дека актерот доживеал срцев застој. Кога полицајците и медицинските екипи пристигнале во неговиот дом во Сент Питерс, Келкер-Кели бил во бесознание и не дишел.
Според медиумските информации, актерот непосредно пред смртта се пожалил на силни болки во градите. Медицинскиот тим веднаш започнал со реанимација и напредни мерки за оживување, но обидите за спасување не успеале и тој бил прогласен за мртов на местото на настанот.
Надлежните органи соопштиле дека нема индиции за нешто сомнително на местото на настанот. Официјалната причина за смртта засега не е објавена.
Роберт Келкер-Кели најмногу ќе остане запаметен по улогата на Бо Брејди во популарната сапуница „Days of Our Lives“, каде што глумеше од 1992 до 1995 година и се појави во речиси 600 епизоди.
Пред тоа настапуваше во серијата „Another World“, а во текот на 2000-тите оствари забележителна улога и во серијата „General Hospital“.