Извршниот одбор на Народната банка донесе одлука стапката на противцикличниот заштитен слој на капиталот за изложеностите на банките во земјава да остане на истото ниво од 2 процента.
Како што соопштија од прес-службата на централната банка, одлуката е донесена врз основа на редовната квартална оцена на системските ризици, според официјалните податоци заклучно со првиот квартал од 2026 година.
Оваа одлука директно ги рефлектира моменталните економски прилики и стабилноста која се бележи кај банкарските субјекти во државата.
„Оваа стапка ќе важи од третото тримесечје на 2027 година и се оценува дека таа е соодветна на тековните макрофинансиски услови и на состојбите во банкарскиот систем. На кредитниот пазар и натаму има солидна кредитна активност, но банкарскиот систем е добро капитализиран и ликвиден, со задржана стабилност и отпорност на шокови. Тоа е видливо и преку ниската стапка на нефункционални кредити, којашто и натаму опаѓа, и преку солидната профитабилност“ – информира Народната банка.
Одлуката за задржување на истата стапка на противцикличниот заштитен слој на капиталот е дополнително поддржана и од построгите макропрудентни мерки за квалитетот на кредитната побарувачка.
Овие рестриктивни мерки се во примена од крајот на претходната година. Во првото тримесечје од 2026 година веќе се забележуваат првичните влијанија преку подобрата структура на новите кредити од аспект на кредитните стандарди применети од страна на банките.
Од централната банка најавуваат континуиран и сериозен мониторинг на сите економски параметри и во следниот период со цел заштита на финансискиот систем.
„Ваквата поставеност на макропрудентните мерки би придонела за ограничување на системските ризици во следниот период и за натамошно задржување на стабилноста и отпорноста на банкарскиот сектор. Народната банка ќе продолжи со внимателно следење на системските ризици и редовно, на квартална основа, ќе ја преоценува висината на стапката“ – велат од Народната банка.