Во хотелот „Александар Палас“ во Скопје денеска ќе се одржи Конференција за социјално претприемништво, организирана од Младински Сојуз – Крушево, Асоцијацијата за истражување, комуникации и развој „Паблик“ и Центарот за истражување и анализа НОВУС.
Настанот има за цел да создаде простор за национален дијалог и зајакнување на соработката меѓу клучните чинители во областа. Се очекува присуство на повеќе од 120 претставници од институции, агенции, граѓански организации, социјални претпријатија, бизнис-заедницата, експерти и млади, кои ќе дискутираат за можностите за развој и унапредување на социјалното претприемништво во земјата.
Програмата предвидува неколку панел-дискусии посветени на креирање одржливи јавни политики, поттикнување на меѓусекторска соработка и зајакнување на улогата на локалните заедници во развојот на социјалното претприемништво. Дополнително, ќе бидат организирани активности за вмрежување со цел подобро поврзување на релевантните актери и градење поцврст и поодржлив екосистем во оваа област.