Премиерот Христијан Мицкоски денеска ја соопшти новата инвестиција на мултинационалната компанија „Џаво Отомотив“ во ТИРЗ Тетово. Станува збор за бренд со повеќе од четири децении искуство во автомобилската индустрија, кој произведува безбедносни системи, контролни кабли и механизми за водечките светски автомобилски производители.
Како што појасни премиерот, компанијата планира во Тетово целосно да го пренесе своето производство кое во моментов се реализира во Турција и Словачка. Инвестицијата ќе започне како „brownfield“ проект со закуп на постоечки објект од 8.000 квадратни метри, со план капацитетите да се прошират до 21.000 квадратни метри до 2028 година. За периодот од 2026 до 2030 година, планираниот влог изнесува околу 20 до 21 милион евра.
Според бизнис-планот, со овој проект ќе се отворат помеѓу 400 и 500 нови работни места кога компанијата ќе го достигне полниот капацитет, а годишниот извоз се очекува да достигне до 45 милиони евра.
Премиерот истакна дека одлуката на странскиот инвеститор да ги пресели своите погони во земјава покажува сигурност и стабилност во економските текови.
„Кога една странска компанија носи одлука дел од своето производство да го пресели токму тука кај нас, тоа значи дека препознала сигурност, предвидливост и јасна економска перспектива“, истакна Мицкоски.
Тој додаде дека доаѓањето на нови компании и проширувањето на постојните капацитети ја позиционираат земјата на европската индустриска мапа, нагласувајќи ја стратегијата на Владата за реален економски развој.
„Ние не градиме економија заснована на задолжувања и статистички трикови. Градиме економија која се потпира на производство, инвестиции, извоз и реален економски раст. И затоа денешната инвестиција на „Џаво Отомотив“ е уште еден показател дека се движиме во вистинска насока“, порача премиерот Мицкоски.