Македонија ќе го добие првиот центар за вештачка интелигенција „Везилка“, кој ќе биде промовиран идната недела, најави министерот за дигитална трансформација Стефан Андоновски.
Центарот ќе има значајна улога во развојот на македонски јазичен модел и создавање домашна дигитална база, со цел македонскиот јазик, култура и идентитет соодветно да бидат застапени во современите технологии.
Проектот „Везилка“ предвидува дигитализација на македонскиот јазичен корпус и развој на голем јазичен модел кој ќе може да го користат институциите, академската заедница, компаниите и граѓаните. Според најавите, целта е намалување на зависноста од странски алатки кои не секогаш го препознаваат македонскиот јазичен контекст.
Носител на проектот е ФИНКИ, кој соработува со повеќе институции, меѓу кои Службен весник на Република Северна Македонија, Собрание на Република Северна Македонија, Национална и универзитетска библиотека „Св. Климент Охридски“ и МАНУ, како и институти за македонски јазик и литература.
Проектот „Везилка“ е вреден 6,5 милиони евра и е поддржан од државни средства, факултетите и Европската Унија. Според најавите, до крајот на годината или почетокот на следната се очекува функционален јазичен модел достапен како „open-source“ решение за институциите и компаниите.
Паралелно се најавува и подготовка на закон за вештачка интелигенција, кој ќе воспостави етички и транспарентни правила за нејзина примена, со фокус на јавната администрација, здравството, земјоделството и културата.