Спортската сала „Расадник“ во општина Кисела Вода од денеска е целосно обновена и подготвена повторно да ги прими спортистите и навивачите. Станува збор за проект кој, според надлежните, претставува враќање на еден од најголемите спортски симболи на Скопје и долгогодишен дом на ракометниот и кошаркарскиот клуб Вардар.
За време на официјалното пуштање во употреба, беше посочено дека објектот со години бил запоставен и оставен во исклучително лоша состојба.
„Кога бев градоначалник на Кисела Вода, ја затекнавме салата во состојба во која не смее да биде оставен ниту еден ваков спортски симбол. Руинирана. Демолирана. Небезбедна. Со долгови. Без живот. Без перспектива. Искрено, многумина тогаш не веруваа дека Расадник може повторно да се врати. Но ние верувавме“, стои во дел од објавата од градоначалникот на град Скопје.
Процесот на реконструкција се одвивал етапно, а конечната реализација е направена со поддршка од централната власт и ресорното министерство.
„Денес, со силна поддршка од премиерот Hristijan Mickoski, Владата на Македонија и министерот за спорт Борко Ристовски – човек кој одлично знае што значи Вардар, што значи спорт и што значи борба за дресот, оваа сала конечно повторно стои исправено. Од денес, Расадник повторно ќе биде дом на Вардар. Како што ветивме“, се нагласува во изјавата на Ѓорѓиевски.
Денес објектот ги исполнува сите современи стандарди за спортски натпревари, со комплетно уредена внатрешна и надворешна инфраструктура. Салата располага со обновен терен, нови соблекувални, простории за стручните тимови, теретана, сопствен систем за греење и ладење, како и нов плоштад околу самиот објект.