Интерпелацијата за министерот Трипуновски не е политички напад, туку одговор на реалните проблеми со кои се соочува земјоделството, кое никогаш не било во полоша состојба, нагласи пратеникот од СДСМ, Борче Цветков, на денешната собраниска седница на која на дневен ред беше интерпелацијата за министерот за земјоделство, шумарство и водостопанство Цветан Трипуновски, поднесена од пратеничката група на СДСМ и коалицијата.
Цветков посочи дека земјоделството е во хаос, земјоделците се понижени и оставени сами да се борат за својата егзистенција, додека субвенциите се скратени и неисплатени.
„Додека се фалите со непостоечки успеси, додека кратењето на субвенциите се обидувате да го претставите како некоја реформа, реалноста на терен е нешто друго. Не постои земјоделец во Македонија кој денес не го поставува истото прашање. Каде се субвенциите? Тутунарите слушаат ветувања дека исплатата ќе биде до крајот на април. Потоа слушнаа дека ќе биде до крајот на мај. Јуни сме, а парите сè уште ги нема, но проблемот не е само со тутунот. Доцнат субвенциите за сточарството, доцнат субвенциите за производството на предадено млеко, доцнат субвенциите за поледелските култури, доцнат субвенциите за градинарството, за пчеларството и за органското производство“, рече Цветков.
Тој нагласи дека наместо да се зголеми поддршката за земјоделците, во изминатите две години Трипуновски донесе одлуки со кои дополнително ја влоши состојбата во секторот, а особено малите производители.
„Ги намаливте субвенциите, ги поништивте повиците за механизација, ги укинавте мерките за микропроизводители. Истовремено го зголемивте лимитот за субвенции до 1 милион евра по корисник. Со други зборови, малите ги оттурнавте, а поголемите ги направивте привилегирани. Тоа не е политика на развој на земјоделството, тоа е политика на концентрација на државната поддршка кај мал број корисници“, рече Цветков.
Во обраќањето Цветков посочи дека наместо развојни политики и реформи, Трипуновски ќе остане запаметен по серија скандали кои дополнително ја нарушуваат довербата во институциите задолжени за земјоделството.
„За две години не видовме ниту една развојна реформа, но затоа видовме купови криминални скандали врз грбот на земјоделците. Во историјата на македонското земјоделство тешко може да се најде период во кој двајца директори од најважните институции во ресорот се фатени во случај со барање мито, двајца ваши најблиски соработници. Ова веќе не е прашање на поединечни случаи. Ова е прашање на политичка одговорност.Кога директорот задолжен да ги контролира земјоделците е осомничен за мито и директорот задолжен да доделува европски средства е осомничен за мито, тогаш никој повеќе не верува дека станува збор за случајност“, рече Цветков.
Притоа, Цветков порача дека фактите и состојбите во земјоделството јасно покажуваат Трипуновски мора да понесе одговорност.
„Министре, вие покажавте дека немате волја да го развивате земјоделството и да им помагате на земјоделците. Долга е листата на факти и докази за вашето неодговорно работење и тоа мора да престане. Доста е од лаги и грабеж од земјоделците“, рече Цветков.