Портпаролот на ВМРО-ДПМНЕ, Валентин Манасиевски, на денешната прес-конференција упати серија обвинувања до опозициската СДСМ, посочувајќи дека кај претседателот на партијата Венко Филипче е евидентна нервоза поради последните меѓународни успеси на државата.
Според партискиот портпарол, актуелната Влада покажува дека може да се води европска политика без тргување со идентитетот, без понижување и без прифаќање диктати на штета на македонските национални интереси.
Во изјавата беа нотирани неколку клучни дипломатски моменти од изминатата недела, меѓу кои пораката од Антонио Кошта за напредокот во Реформската агенда и првиот избор на земјава за членка на Економскиот и социјалниот совет на Обединетите нации (ЕКОСОК).
Манасиевски се повика и на позитивниот нацрт-извештај на Комитетот за надворешни работи на Европскиот парламент за 2025 година, како и на официјалното завршување на пост-мониторингот со Советот на Европа.
Од владејачката партија повлекоа паралела меѓу двата политички блока, нагласувајќи дека актуелната власт посветено работи на позиционирање на Македонија како почитувана европска држава која гради силни партнерства.
„Кај Венко Филипче и СДС е евидентна нервозата, затоа што Македонија конечно има позитивни резултати на меѓународен план. Нервозни се затоа што Владата предводена од ВМРО-ДПМНЕ покажува дека може да се води европска политика без понижување, без тргување со идентитетот и без прифаќање диктати на штета на македонските национални интереси.“