Рускиот претседател Владимир Путин изјави дека нема намера да се состане со украинскиот колега Володимир Зеленски. За време на обраќањето на пленарната сесија на Меѓународниот економски форум во Санкт Петербург (СПИЕФ), тој потврди дека кратко го разгледал отвореното писмо во кое Зеленски го поканува на директни разговори, но нагласи дека во моментов не ја гледа целта на еден таков состанок.
Според оценката на Путин, понудата за дијалог не е искрена и е конструирана на начин кој всушност ги оневозможува преговорите.
Путин: Ова не е начин да се создадат услови за преговори
Рускиот претседател упати сериозни критики за тонот и содржината на писмото испратено од Киев, посочувајќи дека во него има „непристојни елементи“.
„Писмото што го споменавте навистина содржи елементи на грубост. Што е тоа? Дали е тоа начин да се создадат услови за лична средба и преговори? Или создава средина во која е невозможно да се одржат какви било лични состаноци? Мислам дека е второто“, изјави Путин, пренесува агенцијата РИА Новости.
Со ова, Москва јасно стави до знаење дека понудата за директен дијалог меѓу двајцата лидери под овие услови е отфрлена, со став дека писмото на Зеленски имало за цел само да ја поларизира јавноста, а не реално да придонесе кон дипломатско решение.