Со претставата „Мачкина глава“ на Драмски театар – Скопје вечер во Прилеп ќе биде отворено јубилејното 60. издание на Македонскиот театарски фестивал „Војдан Чернодрински“.
Пред свеченото отворање ќе биде поставена изложбата „60 години театарска меморија“, која преку повеќе локации низ градот ќе ја претстави историјата на фестивалот од неговото основање во 1965 година до денес. Изложбата е замислена како комбинација од дигитални и аналогни содржини, во духот на мотото на годинашното издание – „Храбар нов театар“.
Во рамки на отворањето ќе бидат доделени и наградите за животно дело на истакнатите театарски уметници Атила Клинче, Сашо Миленковски, Љубомир Чадиковски и Веби Керими.
Фестивалската програма годинава опфаќа 10 претстави во официјална конкуренција за награди и уште четири во оф-програмата. До 12 јуни публиката ќе има можност да проследи промоции, трибини, тркалезни маси и други придружни настани посветени на театарската уметност.
Автор во фокусот на годинашниот фестивал е драмскиот писател Дејан Дуковски, а фестивалот ќе биде затворен со гостувањето на претставата „Црно злато“ на Белградско драмско позориште, поставена по негов текст.