Министерството за образование и наука ќе финансира 14 заеднички научно-истражувачки проекти меѓу Македонија и Австрија, кои ќе се реализираат во области со голем развоен потенцијал согласно Стратегијата за паметна специјализација.
За секој проект одделно од државниот буџет ќе бидат одвоени по 600 илјади денари, а рокот за нивна имплементација е две години, со почеток од 1 јули 2026 година. Договорите денеска беа потпишани од министерката проф. д-р Весна Јаневска и носителите на проектите.
Како што на прес-конференција информираше министерката Јаневска, на конкурсот пристигнале вкупно 18 апликации, од кои 14 ги исполниле предвидените услови по спроведените домашни и странски рецензии.
„Конкурсот беше објавен во септември минатата година врз основа на Спогодбата помеѓу владите на Македонија и Австрија за научна и технолошка соработка од 2008 година. Пристигнатите проекти беа изработени преку партнерства на државни и приватни универзитети, јавни и приватни научни институти и факултети од двете земји. По спроведените рецензии и од македонска и од австриска страна, беше утврдено дека 14 ги исполнуваат условите и критериумите за да бидат финансирани“, рече Јаневска.
Во однос на распределбата, Универзитетот „Св. Кирил и Методиј“ – Скопје е носител на 9 проекти, Универзитетот „Гоце Делчев“ – Штип на 3, додека по еден проект имаат Меѓународниот балкански универзитет – Скопје и приватниот Институт за сеизмички отпорни градби и климатски промени – Скопје.
Според Фраскатиевата класификација, 6 од избраните проекти се од инженерство и технологија, 5 се од природно-математички науки, два од земјоделски и ветеринарни науки и еден проект е од општествените науки.
„Ова не прв пат да се финансираат ваков тип на проекти, но прв пат во конкурсот даваме предност на проекти од техничките науки, односно на области кои, како што реков се дефинирани како приоритетни за делување со Стратегијата за паметна специјализација на државата, а тоа значи дека таму е препознаен развоен потенцијал“, нагласи Јаневска.
Честитајќи им на носителите, Јаневска порача дека Буџетот за наука во иднина ќе расте, а со тоа и поддршката за вакви меѓународни проекти кои се сметаат за еден од основните столбови на општествено-економскиот напредок.