Вистинска драма се одвивала синоќа околу полноќ на самиот влез на Бранковиот мост во Белград, кога возач на градски автобус изгубил свест, по што возилото удрило во неколку автомобили и ја пробило заштитната ограда.
Среќа во несреќата било тоа што инцидентот се случил доцна навечер и автобусот бил празен бидејќи сообраќал кон гаражата, па во тој момент немало патници во возилото ниту многу луѓе на самата улица.
Поради сообраќајната несреќа, градскиот автобус целосно ги блокираше двете коловозни ленти при влезот на мостот во правец кон Нов Белград, поради што сообраќајот беше во прекин повеќе од еден час.
Возачот (52) во еден момент изгубил свест и контрола над возилото, при што се здобил со тешки физички повреди и по укажаната прва помош од дежурните лекари бил итно пренесен на Военомедицинската академија (ВМА).
Според очевидци, несреќниот возач изгубил свест додека чекал на семафор, по што неконтролирано почнал да удира во возилата пред него, во разделниот остров и на крајот во заштитната ограда.
Пред пристигнувањето на итните служби, случајни минувачи покажале огромно херојство и со раце и нозе ги кршеле вратите на автобусот за да влезат внатре и да му помогнат на повредениот маж.
Предниот дел од автобусот по силниот удар е целосно уништен и згмечен, а полицијата изврши увид на самото место за да ги утврди сите детали за несреќата.
„Сè уште е на опсервација кај нас, пред се невролошки, за да утврдиме кој е практично актуелниот проблем што ја предизвикал ваквата состојба, за среќа без посериозни последици“, откри Небојша Мариќ, дежурен доктор во ВМА.