Во изминатите 24 часа најмногу дожд наврнал во Крушево, каде што се измерени 34 литри на метар квадратен, покажуваат податоците на Управата за хидрометеоролошки работи (УХМР).
Според мерењата, значителни врнежи се регистрирани и во Претор со 30 литри на метар квадратен, Маврови Анови со 28 и Лазарополе со 23 литри. Во Прилеп и Пожаране наврнале 18 литри, во Берово 16, а во Тополчани 14 литри на метар квадратен.
Во Радовиш се измерени 12 литри, а во Струмица и на Попова Шапка по 11 литри дожд. Во Виница наврнале 10 литри, додека во Тетово и Битола по девет литри на метар квадратен.
УХМР најавува дека под влијание на нова циклонска активност ќе продолжи периодот на променливо облачно време со локални врнежи од дожд. За време на викендот повторно се очекуваат пообилни врнежи, локално проследени со невреме, засилен ветер и грмежи.
Според прогнозите, од недела се очекува значителен пад на температурите, а на повисоките планини дождот ќе премине во слаб снег.