Иранската револуционерна гарда (IRGC) соопшти дека гаѓала американска воздухопловна база, како одговор на американскиот напад извршен рано наутро во близина на аеродромот Бандар Абус. Според соопштението пренесено од агенцијата Тасним, цел на IRGC била токму базата од која бил извршен нападот врз ирански контролен пункт.
Претходно, американската војска изведе напади врз иранска операција со беспилотни летала во близина на Ормутскиот Теснец. Анонимен американски официјален претставник за Reuters изјави дека војската соборила четири ирански дронови за напад и погодила копнена контролна точка во пристанишниот град Бандар Абус.
„Овие акции биле одмерени, чисто одбранбени и насочени кон одржување на прекинот на огнот“, рече официјалниот претставник.
Оваа ескалација се случи само неколку часа откако американскиот претседател Доналд Трамп ги отфрли извештаите дека е блиску до компромисен договор со Техеран, со што се загрозува кревкото примирје меѓу двете земји кое стапи на сила во април. По вестите за нападите, цените на нафтата веднаш забележаа раст на светските берзи.
Регионалните тензии веднаш се проширија. Кувајт соопшти дека одговара на нападите со ракети и беспилотни летала, без да прецизира од каде доаѓаат, додека во северен Израел се огласија сирените за воздушена опасност.
Војната, која започна на 28 февруари со нападите на САД и Израел, веќе однесе илјадници животи. Трамп на состанокот на кабинетот упати остри закани и до Оман, кој според иранските медиуми требало заеднички со Иран да управува со сообраќајот во теснецот.
„Никој нема да го контролира Теснецот“, рече Трамп. „Ова се меѓународни води и Оман ќе се однесува како и сите други, или ќе мора да ги дигнеме во воздух. Тие го разбираат тоа, тоа ќе биде во ред.“
Трамп додаде дека не е задоволен од договорот со Иран и дека САД не разговараат за ублажување на санкциите. Од друга страна, Ебрахим Азизи, шеф на комитетот за национална безбедност на иранскиот парламент, порача дека Иран нема да се откаже од своите барања за збогатување ураниум и укинување на санкциите.
„Јасно е дека Трамп, барајќи излез од оваа стратешка блокада, се менува помеѓу закани и повици за договор“, напиша Азизи на мрежата X.
Додека Белата куќа го отфрли иранскиот извештај за нацрт-договор како „целосна измислица“, прашањето за нуклеарното оружје останува главна пречка. Иран тврди дека програмата е за мирни цели, но американскиот државен секретар Марко Рубио на состанокот на кабинетот децидно порача: „Суштината е дека Иран никогаш нема да има нуклеарно оружје“.