Вооружени турски борбени авиони повторно го нарушиле грчкиот национален воздушен простор, при што еден од инцидентите довел до симулирана воздушна битка меѓу два грчки и два турски авиони F-16 во областа меѓу островите Лемнос и Лезбос, пренесува „Катимерини“.
Грчките власти соопштија дека во текот на вчерашниот ден (понеделник) биле регистрирани вкупно 10 повреди на воздушниот простор. Ова е веќе трет ваков инцидент од почетокот на 2026 година, по претходните случаи регистрирани на 26 март и 12 мај.
Во овој дел од Егејското Море во моментот немало воени активности, со оглед на тоа што турската вежба „Ефес 2026“ завршила на 22 мај. Официјална Атина сега анализира дали настанот е изолиран инцидент или пак Анкара се враќа на претходните тактики на притисок.
За инцидентите се говореше и во грчкиот парламент, каде министерот за надворешни работи Јоргос Герапетритис, одговарајќи на прашање за доктрината „Сина татковина“, потенцираше дека меѓународното право бара договор меѓу соседните земји за разграничување на ексклузивната економска зона.
Ваквите прелети се случуваат во период на долгогодишни спорови меѓу Грција и Турција околу воздушниот простор, поморските зони и енергетските интереси, што придонесува за брзо враќање на атмосферата на недоверба меѓу двете земји.