Град Скопје и Националниот демократски институт (НДИ) потпишаа Меморандум за соработка со цел навремено препознавање, намалување и спречување на ризиците од корупција во градската администрација. Документот е дел од поширокиот проект „Зајакнување на отпорноста на општините од корупцијата – Заедници со интегритет“.
Како што соопштија од Градот Скопје, меморандумот го потпишаа градоначалникот на Град Скопје и директорот на НДИ, Роберт Скот Хејзлет.
„Со овој меморандум ја продлабочуваме соработката меѓу Град Скопје и НДИ, преку конкретни активности насочени кон навремено препознавање, намалување и спречување на ризиците од корупција во градската администрација“, се наведува во официјалното соопштение.
Преку оваа иницијатива, локалната самоуправа во главниот град ќе имплементира нови механизми за заштита, кои вклучуваат и надворешна стручна помош за вработените во јавниот сектор.
„За мене, ова е важен чекор кон градење посилен, поотворен и поодговорен систем. Граѓаните заслужуваат институции кои работат чесно, транспарентно и ефикасно, со јасни процедури, поголема отчетност и помалку простор за какви било злоупотреби“, се потенцира во објавата.
Проектот предвидува Град Скопје да добие експертска техничка поддршка за развој на внатрешни процедури за превенција, како и специјализирани програми за обука на градската администрација.
„Целта е администрацијата уште подобро да ги препознава, спречува и пријавува коруптивните практики. Истовремено, ќе работиме на унапредување на транспарентноста преку објавување податоци и јавни информации, како и на дигитализација на услугите, со што ќе ја зголемиме ефикасноста, ќе ја подобриме достапноста за граѓаните и ќе ги намалиме можностите за коруптивни ризици“, стои во текстот на соопштението.
Проектот дополнително ќе ја поврзе локалната власт во Скопје со останатите општини, државни институции, граѓанскиот сектор и медиумите за создавање поцврст систем на одговорност. На крајот, беше упатена и јавна благодарност до партнерите на проектот.
„Благодарност до НДИ, како и до Швајцарската конфедерација и Шведска за поддршката на овој значаен проект. Продолжуваме да градиме Град Скопје кој функционира чесно, отчетно и во интерес на граѓаните“, се заклучува во објавата.